Monday, November 9, 2009

လုံခြုံရေးကြောင့် တက္ကသိုလ် ကျောင်းသားများ စိတ်အနှောင့်အယှက်ဖြစ်

အောင်သက်ဝိုင်း | မြန်မာနိုင်ငံရှိ တက္ကသိုလ်များတွင် အရပ်ဝတ် ရဲတပ်ဖွဲ့ဝင် အများအပြားဖြင့် လုံခြုံရေး တင်းကျပ်ထား သောကြောင့် ကျောင်းသား ကျောင်းသူများ စိတ်အနှောင့်အယှက် ဖြစ်နေသည်ဟု သိရသည်။

နိုင်ငံရေး အခြေခံသော ကျောင်းသား ဆန္ဒပြမှုများ မပေါ်ပေါက် စေရန် မြန်မာနိုင်ငံ ရဲတပ်ဖွဲ့၊ သတင်း တပ်ဖွဲ့ဝင်များက စောင့်ကြည့် နေကြကြောင်း အနောက်ပိုင်း တက္ကသိုလ် ဆရာ၊ ဆရာမ တချို့က ပြောသည်။

“လုံခြုံရေးကို ရဲနဲ့ တက္ကသိုလ် အုပ်ချုပ်ရေး အဖွဲ့တွေ ပူးပေါင်း လုပ်တာပါ” ဟု ဒဂုံတက္ကသိုလ်မှ နည်းပြ တဦးက ဧရာဝတီကို ရှင်းပြသည်။

အဝေးသင် ကျောင်းသားများ၏ ရက်ပိုင်း ကျောင်းတက်ချိန်၊ စာမေးပွဲဖြေချိန်တွင်သာမက ပုံမှန် တက္ကသိုလ် နေ့ကျောင်းများ ပြန်ဖွင့်သည့်အခါတွင်လည်း လုံခြုံရေး တင်းကျပ်လေ့ရှိသည်ဟု သူက ပြောသည်။

လုံခြုံရေး စည်းကမ်းချက်များ အရ ကျောင်းသား၊ ကျောင်းသူများသည် စိစစ်ရေးကတ်များ ရင်ဘတ်တွင် ချိတ်ဆွဲပြီးမှ စာသင်ဆောင်များ အတွင်းသို့ ၀င်ခွင့်ရနိုင်သည်။

“ကျောင်းသားကတ် မေ့ကျန်ခဲ့လို့ပါ ဆိုရင်လည်း မရဘူး၊ စာသင်ဆောင်ထဲ လုံးဝကို ၀င်ခွင့် မပြုတာ။ တကယ်လို့ ကျောင်းသားကတ် မပါဘဲ အတင်းဝင်မယ် ဆိုရင် ကျောင်းစည်းကမ်း ဖောက်ဖျက်မှုနဲ့ အရေးယူခံမယ် လို့ ပြောတယ်” ဟု လှိုင်သာယာမြို့နယ်ရှိ အနောက်ပိုင်းတက္ကသိုလ်မှ ကျောင်းသားတဦး က ရှင်းပြသည်။


လုံခြုံရေး တင်းကျပ်ထားခြင်းမှာ နိုင်ငံရေး နှင့် ဆက်နွယ်သူများ ၀င်ရောက်ပြီး ကျောင်းသားများကို လှုံ့ဆော်ခြင်းမှ ကာကွယ်ရန်၊ တည်ငြိမ် အေးချမ်းစွာ ပညာသင်ကြားမှုကို ဖျက်ဆီးမည့် အဖျက်သမားများ ရန်မှ ကာကွယ် တားဆီးရန် ဖြစ်သည် ဟု အနောက်ပိုင်း တက္ကသိုလ် မော်ကွန်းထိန်းရုံးမှ ၀န်ထမ်းတဦးက ပြောဆိုသည်။


“ကျောင်းသားကတ် မပါရင် ကျောင်းသားလား၊ နိုင်ငံရေး လှုပ်ရှားသူလား၊ အကြမ်းဖက် ဗုံးထောင်မယ့်သူလား ကျမတို့က ဘယ်လို ခွဲခြားလို့ရမလဲ။ ကလေးတွေ စာ အေးအေး ဆေးဆေး သင်နိုင်အောင် ဒီလို အစီအမံတွေ လုပ်ထားတာပါ” ဟု ၎င်းက ဆိုသည်။


အာဏာပိုင်တို့က ကျောင်းသား ကျောင်းသူ အချင်းချင်း စုစည်း ညီညွတ်မှု မရှိစေရန်လည်း တင်းကျပ်သော စိစစ်မှုများကို ရည်ရွယ်ချက်ရှိရှိ ပြုလုပ်ထားပုံရသည်ဟု ကျောင်းသား တဦးက သုံးသပ်သည်။


“မြန်မာစာကျောင်းသားက ပထ၀ီဝင် ကျောင်းသားဆီ အလည်သွားလို့ မရဘူး။ မြန်မာစာ ကျောင်းသားကတ်နဲ့ ပထ၀ီဆောင်ထဲ ၀င်လို့ မရဘူး။ ပေးမ၀င်ဘူး။ ကျောင်းသူ ကျောင်းသားတွေ စုစည်းလို့ မရအောင် လုပ်ထားတာလို့ ပြောလို့ရတယ်” ဟု အနောက်ပိုင်းတက္ကသိုလ် မြန်မာစာကျောင်းသားတဦးက ပြောသည်။


ကိုယ်ပိုင်ကား၊ အငှားကားတို့ဖြင့် လာသည့် ကျောင်းသား၊ ကျောင်းသူများကိုလည်း အမည်နှင့် ခုံနံပါတ် မှတ်သားခြင်း၊ ကားနံပါတ်နှင့် ယာဉ်မောင်း အမည်ကို စစ်ဆေး မေးမြန်းခြင်းများ ပြုလုပ်ပြီးမှ ကျောင်းတွင်းသို့ ၀င်ခွင့်ပြုသည်ဟု ဆိုသည်။


ကျောင်းသား ကျောင်းသူများ စိတ်အနှောင့်အယှက် ဖြစ်ရသည့် အကြောင်းရင်းမှာ လုံခြုံရေး တင်းကျပ်မှု တခုတည်းကြောင့် မဟုတ်ပေ။


ယနေ့ခေတ် တက္ကသိုလ် ကျောင်းများမှာ ဝေးလံ ခေါင်သီလှသော မြို့ပြင်ဒေသများတွင် တည်ရှိသည့် အတွက် ကျောင်းသားများက နေ့စဉ် အချိန်ကြာမြင့်စွာ ခရီးသွားလာကြရသည်။


“လိုင်းကား တိုးစီးရတာနဲ့ ကျောင်းရောက်ရင် စာသင်ဖို့ အားမရှိတော့ဘူး။ နေ့တိုင်း ပင်ပင်ပန်းပန်းနဲ့ ကျောင်းတက်နေရတာပါ” ဟု ဒဂုံတက္ကသိုလ် ကျောင်းသူတဦးက ပြောသည်။


ရန်ကုန်တွင် ကျောင်းသား ဆန္ဒပြမှုများ မကြာခဏ ဖြစ်ခဲ့ဖူးသည့် အတွက် မြို့တွင်း အချက်အချာကျ နေရာများရှိ ရန်ကုန်တက္ကသိုလ်၊ စက်မှုတက္ကသိုလ် တို့ကို ဒဂုံမြို့သစ်၊ လှိုင်သာယာ၊ ရွှေပြည်သာ၊ သန်လျှင် စသည့် မြို့ပြင် ဆင်ခြေဖုံးဒေသများသို့ ပြောင်းရွှေ့ခဲ့ခြင်း ဖြစ်သည်ဟု အများက ယုံကြည်ကြသည်။


ယခု အဝေးသင်တက္ကသိုလ် စာမေးပွဲများ ပြုလုပ်နေချိန်အတွင်း ရန်ကုန်တွင် လုံထိန်းရဲကားများ လှည့်လည် သွားလာနေသည်ကို တွေ့ရသည်။


မြန်မာနိုင်ငံ တ၀န်းတွင် အဝေးသင်တက္ကသိုလ် အနီးကပ်သင်တန်းများ၊ စာမေးပွဲများကို အောက်တိုဘာ၊ နိုဝင်ဘာလတို့တွင် နှစ်သုတ်ခွဲ ပြုလုပ်နေပြီး ဒီဇင်ဘာလတွင် နေ့စဉ် တက်ရသည့် တက္ကသိုလ် ကျောင်းများ အားလုံး တပြိုင်တည်း ဖွင့်လှစ်မည် ဖြစ်သည်။


အဝေးသင်တက္ကသိုလ် ကျောင်းသားများ အတွက် စာသင်ရက်များမှာ စာသင်နှစ် တနှစ်လျှင် ၁၀ ရက်သာရှိသည်။ သိပ္ပံဘာသာရပ် အထူးပြု ကျောင်းသားများသည် စနေ တနင်္ဂနွေနေ့များတွင် လက်တွေ့ခန်း အသုံးပြုနိုင်သည်။ စာသင်နှစ် တနှစ်လျှင် ၅ လခန့် လက်တွေ့ ဆင်းရန် သတ်မှတ်ထားသည်။


၁၉၉၁/၉၂ ပညာသင်နှစ်မှ စတင်ခဲ့သော အဝေးသင် တက္ကသိုလ် ပညာရေး စနစ်သည် ကျောင်းသားများ စုစည်းမှု မရှိကြစေရန် အာဏာပိုင်တို့က ကျင့်သုံးခဲ့သော စနစ်ဖြစ်သည်ဟု အကဲခတ်များက ယူဆကြသည်။



No comments:

Post a Comment